[color=orange]الـــــــــــــــــــــــــــــــــــــــــــــــــمـــــــــــــــبــــــــــــــــــ

جابك الله من غياب ضيق صدور المباني
قبل لا الوحشه تزعزع بيتك الصلب وتبيده
بيتك اللي من رحلت وكل جدرانه تعاني
ماتحمل ينتظر شهرين وعيونك بعيده
الله العالم لو انك جيت متاخر ثواني
ماتشوف الا بقايا من حصاه ومن حديده
من عرفتك وانت تايه من مواني في مواني
وتارك قلبي مولع من وقيده في وقيده
ضاعت سنيني احد بهالليالي وتحداني
وانت ماتشبع غياب وماتخاف من النقيده
ودي اتحمدلك الله بالسلامه مامداني
كل ماتوصل برحله ترجع برحله جديده
دام تدري كل وجه غير وجه الله فاني
ياخي اكسب لك ثواب وخاف ربك في عبيده
كان فيني عيب قلي فيني العيب الفلاني
كان هرجي مزعلك في شي قلي لاتعيده
عيب تصغر في عيوني وانت بارقاب الغواني
ليه تستسهل طعوني وانت خابرني وليده
لعن ابوك ان مت بيدك من يفكك من اخواني
لاحزنوا ربعي على فرقاي شلي تستفيده
انت منت اللي عشقته انت اكيد انسان ثاني
ليه صرت بهالبرود وهالاحاسيس البليده
وين حبك للزعل وين العناد الاولاني
وين حنية زمان وفرحة العمر الرغيده
وين ذاك اللي ليا اقبل مايبات الا باماني
وين راح اللي ليا اقفى مايروح الا فقيده
واحدن من جابه الله بس يامر ويعصاني
الوحيد اللي اخاف ازعله وامشي معه سيده
مابغيت اطيح بيده لين ماربي بلاني
والا انا لوهي بكيفي مابغيت اطيح بيده
ذاك بس اللي ليامن جيت له لخبط كياني
اللي بنظره ينشف دم قلبي في وريده
قبل اشوفه اجمع له احلا القصايد والمعاني
وان لقيته ما عرفت اقول له جمله مفيده
الف مره قبله اعدله القصد من لساني
ولعن ابوه ان جيت عنده قمت اخربط بالقصيده
امدحه وانا ادري انه لو تباطاني نساني
انطحه وانا ادري انه مجنون وافكاره عنيده
من يسوي بي سواتك يالرهيف الاسمراني
منهو من الناس غيرك غلطته ترفع رصيده
من يقص جناح طيرك وانت اعز انسان جاني
ليه اخاف رماح غيرك وانت ضرباتك سديده
ان تبعتك اتبعك من طيبي وواسع بطاني
والا انا لاجيت اكيد انسان تدري كيف اكيده
اقدر انزعلك ثيابي والبس ثياب الاناني
واقدر اطلع من عذابي والعب بدورك واجيده
ومستعد اكسب رهاني لوبغيت اكسب رهاني
واخدعك باحساس كاذب واتحدى من يصيده
ابك انا لاشفت خلي حط غيري في مكاني
والله اني لا اتركه وواصد واعشق سيد سيده
جيت ما ابيك تحقرني جيت ابيك تعز شاني
جيت ابي فزعة ضلوعك من مشاعرك البليده
خلني داخل حدودك واجبر بخاطر زماني
اكذب بباقي وعودك واصدق بلحظه سعيده
انتشلني من برودك لوتولع بالمحاني
عطني احساس بوجودك واخذ كل اللي تريده
تكفى واليا قلت تكفى بيع خلق الله عشاني
لا تضيع من يديني فرصة العمر الوحيده
يعلم الله شفت منك ومن غيابك ما كفاني
كان ماتقدر تخفف هم قلبي لاتزيده
شف غيابك وش مسوي بالصدور وبالمباني
وانت تدري كيف كانت صدمة غيابك شديده
والله انك لو وصلت البيت متاخر ثواني
ماتشوف الا بقايا من حصاه ومن حديده
الشاعر المبدع(حامد زيد)